പ്രണയലോകം

കാരുണ്യത്തിന്‍ മുത്ത് രത്നാം,ലോകാനുഗ്രഹി 

പ്രവാചകപ്രഭുവിനുമേൽ മാലോകരുടെ സ്വലാത്തിൻ വർഷം
ചൊരിഞ്ഞിടുവാൻ, എല്ലാ  സാഹിതീയലോകങ്ങൾക്ക് 

അതീതമായ അൽഭുതങ്ങളുടെ അൽഭുതമാം അല്ലാഹുവിൻ
അക്ഷരങ്ങളുടെ അക്ഷയഖനിയാം  ഖുർആനിൻ സുന്ദര വചനങ്ങളിലൂടെ,

കാരുണ്യവാനും കരുണാനിധിയുമാം ദൈവം അരുളുന്നു, 

ലോകത്തിൻ രക്ഷിതാവ്, ലോകത്തിൻ പ്രകാശത്തെ പ്രകീർത്തിച്ചിടുന്നു.

കഠിനവൈരിയാം, ഹിജാസ്സിൻ കാവ്യശില്പി കഅ്ബിനു
പോലും മാപ്പരുളിയ സമ്പൂർണതയുടെ നിറകൂടമായ
പുഞ്ചിരിയില്ലാതെ മൊഴിയാത്ത തിരുനബിക്ക്

"പ്രകാശ പ്രസരണം നടത്തും  ഖഡ്‌ഗമാം തിരുദൂതർ, 

അല്ലാഹുവിൻ ഊരിപ്പിടിച്ചൊരു  ഇന്ത്യൻ  വാൾ"

തുടങ്ങിടും  കവിത പ്രവാചക കവിയായി കഅ്ബ് ആലപിച്ചിടുന്നു

രാജകൊട്ടാരത്തിൽ പാടിടും കവിയുടെ ദേഹം
രോഗശയ്യയിൽ തുടരുമ്പോൾ മനസ്സിൻ സഞ്ചാരം
മദീനയുടെ തിരുമുറ്റത്ത് എത്തിയപ്പോൾ,തിരുദൂതർക്ക്
ഉത്തമ മർത്ത്യരിൽ ഉത്തമനാണല്ലോ മുഹമ്മദ്

അറബിക്കും അനറബിക്കും അദൃശ്യമാം ജിന്നുകൾക്കും
പ്രിയമാം മുഹമ്മദിൻ നാമം, എന്ന് ചൊല്ലി

മുത്തുകൾ ചേലിൽ  കോർത്തിടും പോൽ മനോഹരമാകി
ഇമാം ബൂസ്വൂരി ഖസീദതുൽ ബുർദ: യിലൂടെ പാടിടുന്നു

സൃഷ്ടിയുടെ സങ്കടങ്ങള്‍ ആവലാതികളായി ദൈവസമക്ഷം
സമർപ്പിച്ച് സമുദായത്തിൻ സ്ഥിതിക്കൊരു മാറ്റത്തിൻ മറുപടി
നക്ഷത്രലോകങ്ങൾക്കപ്പുറത്തുള്ള ലോകങ്ങളിൽ ശ്രവിച്ചപ്പോൾ

മുഹമ്മദിലുള്ള വിശ്വാസം ലംഘിക്കുകയില്ലെങ്കിൽ
നാമെപ്പോഴും നിന്റെ കൂടെയാണെന്ന്  ദിവ്യശബ്‌ദം.

അല്ലാമ ഇഖ്‌ബാൽ മദീനയുടെ നിത്യകാമുകനായി വിവരിക്കുന്നു.

പ്രണയകൂടാരത്തിൽ കവികൾ പറഞ്ഞുകൊണ്ടിരിക്കുകയാണ്

ആത്മീയദാഹത്തിൻ പ്രതീകങ്ങൾ വർണനകൾക്കപ്പുറമാണെന്ന്

ഞാനൊരു പ്രണയിനിയാകുവാൻ വർണനകൾ തുടരുന്നു

ഒരു കവിയുടെ ജന്മത്തിലേക്കല്ല, മുഹമ്മദിൻ നാമത്താൽ പൂരിതമാം

അനശ്വരമാം രാപ്പാടി പാടും  പ്രണയലോകത്തിലേക്ക്.